‘Cinema en curso’ é un programa de pedagoxía do cinema en escolas e institutos. Ten dous grandes obxectivos: propiciar o descubrimento por parte de nenas e nenos do cinema entendido como arte, creación e cultura; e desenvolver as potencias pedagóxicas da creación cinematográfica no contexto educativo.
Un dos principais eixos de Cinema en curso son os obradoiros, que se desenvolven con alumnado de entre 8 e 18 anos ao longo de todo un curso, dentro do horario lectivo e son impartidos conxuntamente por un equipo de docentes e un ou unha cineasta.
Nos obradoiros os alumnos ven cinema de autores moi diversos –como Chantal Akerman, Johan van der Keuken, David Perlov, Jonas Mekas, José Luis Guerin, Raymond Depardon e Agnès Varda– e desenvolven diversas prácticas que culminan coa realización dunha curtametraxe documental na que os mozos e mozas exploran a súa contorna cotiá.
Todos os procesos son colectivos: a documentación e o guión elabóranse entre todo o grupo; durante a rodaxe os cargos distribúense rotativamente de xeito que todo o alumnado desempeña cada unha das funcións (dirección, cámara, sonidista, script…); a montaxe faise alternando o traballo en grupo pequeno e gran grupo.
Cinema en curso é un proxecto internacional da asociación A Bao A Qu que en Galicia coordina desde o ano 2012 a Filmoteca de Galicia – AGADIC. O proxecto iniciouse en 2005 en Cataluña e actualmente tamén se desenvolve en Madrid, Euskadi, Valencia, Alemaña, Chile e México.
Os cineastas do equipo de Cinema en curso en Galicia son Xacio Baño, Jaione Camborda, Eloy Domínguez Serén, Marcos Flórez, Otto Roca e Ángel Santos.
Nesta edición de Cineuropa exhibirase unha escolma de filmes realizados no marco de Cinema en curso en escolas e institutos de Galicia durante os cursos 2019-2020 e 2020-2021.
A pesar de todo
Ano
2020
Nacionalidade
Galicia
Duración
14 min.
Xénero
Documental
Idioma
Galego
O grupo de 1º de bacharelato artístico do IES O Ribeiro preparaban unha película sobre os oficios e as xentes de Ribadavia. En marzo de 2020 suspendéronse as clases. Seguiron encontrándose virtualmente filmando desde as súas casas. O 19 de xuño reencontráronse para rodar a súa película.
Ao encontro. Diario de impresións e estacións
Ano
2021
Nacionalidade
Galicia
Duración
19 min.
Xénero
Documental
Idioma
Galego
Cunha cámara Bólex de 16 mm e unha gravadora de son, os alumnos de 6º de primaria do CEIP de Tenorio saen ao encontro da natureza e do cinema, inspirados por moitos cineastas: Jonas Mekas, Chantal Akerman, Franco Piavoli, James Benning. A modo de diario filman o bosque a finais do inverno, as ovellas e flores no prado en primavera e o mosteiro de San Pedro de Tenorio co seu último habitante, Don Jesús. Camiñando e filmando por Tenorio ata o solpor no monte Coirego. Xente, flores, cores… vida!
O Mosteirón. Voces do tempo
Ano
2021
Nacionalidade
Galicia
Duración
17 min.
Xénero
Documental
Idioma
Galego
Os alumnos de 4º de ESO recompoñen a memoria do instituto onde estudan e que se creou hai 50 anos para acoller as orfas do mar. A través das voces de internas, traballadoras da época e de fotografías antigas, lembramos a historia do actual IES O Mosteirón.
Os ollos do mar
Ano
2021
Nacionalidade
Galicia
Duración
9 min.
Xénero
Documental
Idioma
Galego
A través de paisaxes, retratos e conversacións con mariscadores e percebeiros, descubrimos a localidade costeira de Rinlo e, ao mesmo tempo, a dureza dun modo de vida, a nostalxia do pasado, o respecto cara ao mar e o amor polo oficio.
Rostros de vida
Ano
2021
Nacionalidade
Galicia
Duración
17 min.
Xénero
Documental
Idioma
Galego
Os avós e as avoas dos alumnos de 6º de primaria do CEIP A Rúa en Cangas comparten a través do cinema as súas vidas. O traballo desde mozos no campo, a sabiduría e autonomía do traballo da terra. E tamén a dureza do traballo no mar, a vida nun barco, o longo tempo lonxe da familia. Rostros de esforzo e da complicidade cos netos que os retratan.