JOSEFINA

Juan é un funcionario de prisións que observa en silencio cada domingo a visita de Berta, a nai dun dos presos. O día que por fin logra achegarse a ela, sorpréndese a si mesmo facéndose pasar por outro pai e inventándose a unha filla dentro do cárcere: Josefina. A necesidade de encher o baleiro no que viven Juan e Berta levaraos a seguir véndose máis aló da realidade que os rodea.

O gañador dun Goya pola curta A la cara Javier Marco, presenta un coidado duelo de soidades encarnado por Emma Suárez e Roberto Álamo. Ambos os dous intérpretes sustentan con brillantez os seus personaxes desvalidos, un autista emocional e unha muller á que lle voaron os cimentos por completo. E as citas filosóficas que figuran nos sobres de azucre do café que el toma no traballo van preparando unha situación de todo inesperada e que conduce a Josefina ao territorio do máxico. As aparicións insospeitadas xorden tamén con suavidade de ningún xeito truculentas, nun xiro argumental tan aberto como sorprendente. Un belo e tormentoso exercicio de supervivencia emocional o destes dous seres á deriva, contado con sutileza e infinito respecto.