#CINEUROPA31

'Zama', de Lucrecia Martel, chega a Cineuropa

20 de Nov de 2017

Cando na pasada edición do festival, Cineuropa lle outorgou o premio a Lola Dueñas, a actriz salientaba entre os seus proxectos a estrea de Zama que tería lugar este ano 2017. Dueñas referíase á adaptación cinematográfica da novela de culto de Antonio di Benedetto, dirixida pola súa admirada Lucrecia Martel e que ela mesma protagoniza xunto a Daniel Giménez-Cacho. Este luns péchase o círculo coa estrea dese filme no Teatro Principal ás 22:30 h. Trátase dunha película hipnótica que mereceu esta mención especial no Festival de Cine de Sevilla: Transnacional, transterritorial, poética e politicamente, a película explora un universo fantasioso pero histórico que nunca deixa de evocar o tempo presente.

[ Ler máis ]

#CINEUROPA31

Carla Simón recolle o Premio Cineuropa

19 de Nov de 2017

Este domingo celebrarase a entrega do Premio Cineuropa a Carla Simón. Segundo a coordinadora de programación do festival, Alejandra Trelles, outórgaselle este galardón en recoñecemento á súa “delicada e aguda mirada sobre o mundo”. A guionista e directora catalá, que xa demostrara esta sensibilidade nas súas curtas, pasou como un ciclón por Cannes, Berlín, Bos Aires ou Málaga coa súa ópera prima, Estiu 1993. Trala entrega do premio, que terá lugar ás 19:45 h. no Salón Teatro de Santiago de Compostela, exhibiranse a súa primeira longametraxe e a curtametraxe Llacunes, unha fita rodada parcialmente en Galicia na que recupera a figura da súa nai, cuxa influenza é esencial en Estiu 1993. A entrada será gratuíta previa recollida de convites no despacho de billetes do Teatro Principal.

[ Ler máis ]

#CINEUROPA31

O Festival Cineuropa rende homenaxe a Costa-Gavras

18 de Nov de 2017

O cineasta franco-grego Costa-Gavras recibirá este sábado o Premio Cineuropa pola "capacidade que o seu cinema posúe para recolocarse unha e outra vez na máis ardente disidencia" e o seu incisivo labor de cronista dos grandes conflitos políticos e sociais do mundo occidental, que concorda plenamente co leit-motiv desta edición. A cita con Costa-Gavras será ás 19:30 horas no Teatro Principal. O acceso é gratuíto previa retirada de convite no despacho de billetes do mesmo Principal. Un día antes da homenaxe, o cineasta foi recibido en Raxoi polo alcalde de Santiago, Martiño Noriega.

[ Ler máis ]

#CINEUROPA31

Este venres chega a Cineuropa 'Mister Universo'

17 de Nov de 2017

Unha das estreas do día foi merecedora dunha mención especial no Festival de Locarno na edición de 2016. Trátase de Mister Universo (2016), de Tizza Covi e Rainer Frimmel, unha particular, tenra e desencantada imaxe do circo de atraente estilo documental que a achega ao neorrealismo italiano. Non desaproveiten a ocasión de coñecer a Tairo, un mozo domador de leóns que nos convida a entrar na idiosincrasia circense de personaxes cativadores, humanos e desmitificados. A cita con Tairo será ás 21:30 h. no Salón Teatro.

[ Ler máis ]

#CINEUROPA31

Hong Sang-soo, Haneke e Claire Denis, figuras destacadas deste xoves en Cineuropa

16 de Nov de 2017

Logo dunha semana de proxeccións nas que máis de 8.000 persoas pasaron polas distintas sedes de #Cineuropa31, o Teatro Principal de Santiago de Compostela acollerá o xoves pola noite unha das estreas máis agardadas do festival. Trátase de La caméra de Claire, do director e guionista de Corea do Sur Hong Sang-soo . Será ás 23:30 horas cando se proxecte esta sinxela historia de complicidade entre mulleres que o cineasta filmou durante o festival de Cannes de 2016, e que está protagonizada por Kim Min-hee e Isabelle Huppert. A actriz francesa asume tamén o rol central da fita Happy end (2017), de Michael Haneke. O segundo e último pase deste filme terá lugar no Teatro Principal ás 21:45 horas.

[ Ler máis ]

#CINEUROPA31

Volven a Cineuropa Michael Haneke, Valeska Grisebach e Serge Bozon

15 de Nov de 2017

Este mércores, na novena xornada do festival, poderemos asistir tamén ás estreas do novo de Michael Haneke, Valeska Grisebach, Serge Bozon ou João Moreira Salles. O filme Western, de Valeska Grisebach, a primeira estrea do día (Teatro Principal ás 17:45 h), foi seleccionada polos mellores festivais e vén de acadar o Gran Premio do Xurado no Festival de Cine de Sevilla. Trátase, segundo José Luis Losa, "dunha obra de natureza indomable". A continuación, ás 20:00 h, no mesmo Teatro, comezará Happy end, o agardado retorno de Michael Haneke e a primeira das dúas películas da xornada protagonizadas pola gran Isabelle Huppert. O filme, un retrato dunha familia burguesa coa escuridade hannekiana habitual, acaba de ser nomeado aos European Film Awards. Ás 22.15 h rematará a programación do Principal coa estrea de Madame Hyde, de Serge Bozon, unha aceda comedia coa que Huppert acadou o premio á mellor actriz no Festival de Locarno. A axenda de novidades da xornada complétase no Salón Teatro ás 22.30 h coa estrea de No intenso agora, de João Moreira Salles, un documental de corte histórico, á vez que nostálxico, familiar e de marcado ritmo, que constitúe un dos mellores filmes do ano.

Ademais, o mércores déixanos unha nova oportunidade para ver 120 battements par minute, de Robin Campillo, Gran premio do xurado e FIPRESCI en Cannes, que acaba de recibir tamén o nomeamento aos European Film Awards; e Comrade, where are you today?, de Kirsi Marie Liimatainen, un documental na liña revolucionaria desta edición que está a recibir moi boa acollida entre o público do festival (7,58).

Tamén terá lugar o último pase de Alba, de Ana Cristina Barragán, filme ao que espectadoras/es do festival outorgaron un 7,75 no pase anterior. Trátase dun fermoso relato de iniciación que emana autenticidade e que foi premiado en Rotterdam e San Sebastián.

Ao longo da xornada, poderase asistir a outras proxeccións de filmes pertencentes ás diferentes seccións que compoñen a 31ª edición do festival

[ Ler máis ]

#CINEUROPA31

O actor Leonardo Sbaraglia recolle o Premio Cineuropa

14 de Nov de 2017

Este martes preséntase intenso en canto a citas cinematográficas. Ás 20 h. terá lugar a entrega do premio Cineuropa ao actor arxentino Leonardo Sbaraglia; ás 22:30 h. celebraranse dúas estreas no Salón Teatro e no Teatro Principal e, ao longo da xornada, realizaranse presentacións e coloquios de varios filmes galegos que están a acadar un éxito notable de público e crítica.

[ Ler máis ]

#CINEUROPA31

Chega a Cineuropa '120 pulsacións por minuto', unha das sensacións deste ano en Cannes

12 de Nov de 2017

O cineasta Robin Campillo emocionou en Cannes coa súa película máis recente: 120 pulsacións por minuto. Non gañou a sección oficial pero si acadou o Gran premio do xurado e o FIPRESCI. O filme é unha homenaxe aos compoñentes do grupo Act Up-Paris, o histórico movemento activista que promulgaba a acción directa en favor das persoas con VIH e que aínda hoxe é considerado unha referencia para o activismo europeo. A proxección comezará ás 21 h. no Teatro Principal.

[ Ler máis ]

#CINEUROPA31

Cineuropa celebra a estrea estatal de 'Napalm', o último de Claude Lanzmann

12 de Nov de 2017

Ao igual que na xornada do sábado, Cineuropa ofrecerá este domingo vinte e unha citas cinematográficas. Unha delas é a estrea estatal de Napalm, o último documental do nonaxenario Claude Lanzmann, autor daquel fito cinematográfico — e histórico— que foi Shoah. En Napalm, a historia de amor entre unha enfermeira coreana e o propio Lanzmann, que visitaba Corea do Norte como integrante da primeira delegación de Europa Occidental convidada ao país tras a guerra que minou ás dúas Coreas entre 1950 e 1953, serve de escusa ao cineasta para volver a Pyongyang co fin de afondar na historia e retratar a actual realidade ditatorial norcoreana. A cita con Napalm será ás 22:15 h. no Teatro Principal.

[ Ler máis ]